Artrosiaren jatorrian giltzarria den proteina bat identifikatu dute
Klothoa galtzeak, hau da, “zahartzaroaren aurkako proteina” bat, laguntzen du giltzadura-ehunaren gogortzea argitzen
Artrosia azaltzen duen kartilago artikularra gogortu eta hausteak klothoaren galeran izan dezake jatorriaren zati bat, proteina horren mailak adinarekin jaitsi egiten dira eta. Hala iradokitzen du azterlan batek, Massachusetts-eko Spaulding errehabilitazio-sare (https://spauldingrehab.org/) deritzan medikuntza fisikoko zentro monografikoko zientzialariek egindakoak, eta Nature Communications-en argitaratuak.
Klotho bizitza luzeraren proteinatzat aipatua izan da, bere galera mailakatua zahartzearekin lotuta dagoelako. Era berean, muskulu eskeletikoaren mitokondrietatik babesten du, eta funtsezko eginkizuna dauka lesio baten ostean ehun hori birsortzeko.
Ikerketaren arabera, zelulaz kanpoko matrizearen zurruntasuna handitzeak (proteina-sare bat eta organismoaren ehunak inguratzen eta eusten dituzten beste molekula batzuk) belauneko kartilagoan klotho proteina gutxitzea eragiten du, eta horrek kalte egiten die kondrozitoei. Aitzitik, kondrozito zahartuak zelulaz kanpoko matrize bigunago baten eraginpean egoteak gazteago bihurtu zuen belauneko kartilagoa, eta horrek erakusten du proteinaren maila aldatzea faktore epigenetikotzat har daitekeela artrosian.
Biztanleriaren zahartzeagatik aurreikus daiteke artrosia gero eta ohikoagoa izango dela eta, beraz, gizartearen zati handi baten bizi-kalitatea ere txikiagotuko dela.
Adinean aurrera egin ahala, artikulazioak zurrunago bihurtzen dira; pixkanaka, kartilago artikularra gogortu eta apurtzen hasten da, eta horrek hezurrari eragiten dio. Gainera, ez dago gaixotasun artikular endekapenezkoa sendatzeko tratamendurik, eta mekanismo eragileak ere ez dira sakon ezagutzen.
Azterketa masa-espektrometriaren teknologia aurreratuaz egin da, zeinen bidez artrosi artikularra zeukaten saguen egiturek eta proteinek bizitzan zehar izandako aldaketen ibilbidea marraztu ahal izan zen, bai eta sexuaren arabera egin ere.
Emaitza esperimentalak gizakiengan egindako analisi-datuetara estrapolatu ziren, eta ikusi zen belauneko kartilagoko ehuna zurrunagoa bihurtzen zenean klothoa kodetzen duen genea inhibitu egiten zela.
Ikerketaren ondorioek erakusten dute klothok artrosiaren agerpenean duen eginkizuna, eta eskaintzen dituzte kartilagoaren osasuna berreskuratzeko diana terapeutiko izan daitezkeenak. Ikertzaileek adierazi dute, era berean, haien emaitzak aplika daitezkeela zahartzeak organismoaren beste ehun batzuetan eragiten dituen faktore epigenetiko mota honen ondorioetan. Kondrozito gazteek zahar ziruditen klothoaren galeragatik gainazal zurrun baten gainean jartzen zirenean, baina ikertzaileek zelulak inguruko zurruntasunetik babesten zituztenean, osasuntsu irauten zuten.
Fabrisia Ambrosio Spaulding errehabilitazio sareko ikerlariaren arabera, aurkikuntzak artrosia zergatik gertatzen den mekanikoki hobeto ulertzea dakar, eta ikerketa-ildo bat irekitzen du aldaketa horiek prebenitzeko terapiak garatzeko. Era berean, aurkikuntzak artikulazio-eremutik haragoko ondorioak izango ditu zahartzeari buruzko ikerketetan.
Iturriak:
Diario Médico 10/01/2023 https://www.diariomedico.com/medicina/rehabilitacion/identifican-una-proteina-clave-en-el-origen-de-la-artrosis.html
Nature Communications 4/01/2023 https://www.nature.com/articles/d41573-022-00215-x
